თამაზ ბაკურიძე, ქრისტიან-დემოკრატიული მოძრაობის ქობულეთის ორგანიზაციის ხელმძღვანელი: "სხვათა შორის, ეს ქობულეთის ის უბანია, რომელმაც თავის დროზე აჭარის რევოლუციის ბედი გადაწყვიტა. გახსოვთ, ალბათ, ჩოლოქის ხიდის აფეთქება საკურორტო სეზონის დაწყებამდე საკმაოდ გამაღიზიანებელი აღმოჩნდა ქობულეთელებისთვის, რადგან ფაქტობრივად სეზონის ჩავარდნა ემუქრებოდათ. დღეს სახლ-კარის გარეშე დარჩენა იმ ადამიანებს ემუქრება, ვინც დიდი როლი ითამაშა, სააკაშვილი ვარდებით რომ შესულიყო აჭარაში.

მას შემდეგ, რაც რეგიონში ტურიზმის განვითარება ხელისუფლებამ პრიორიტეტად გამოაცხადა, ქობულეთის მოსახლეობასაც გაუჩნდა სურვილი და იმედი, რომ ქვეყანაში ტურიზმი განვითარდებოდა, ბანკებიდან აიღეს კრედიტები, ზოგმა სახლების კეთილმოწყობისთვის, ზოგმა საოჯახო სასტუმროების მშენებლობისთვის. თავიდან ბიზნესი თითქოს კარგად ვითარდებოდა, მაგრამ 2008 წლის ომის შემდეგ აჭარა მთლიანად დაცარიელდა ტურისტებისგან და შესაბამისად სეზონიც ჩავარდა. ამ ხალხს, ვისაც ბანკიდან სოლიდური კრედიტები ჰქონდა აღებული, ვალი დაედოთ. მიუხედავად ამისა, იმედი ჰქონდათ, რომ მომდევნო წლის სეზონზე მაინც შეძლებდნენ ზარალის ანაზღაურებას, მაგრამ 2009-2010 წლებში ხელისუფლებამ მოულოდნელად დაიწყო გზების მშენებლობა ქობულეთში, გადათხრილი იყო ყველა ცენტრალური ქუჩა და მტვერსა და ხმაურს ტურისტებიც გაურბოდნენ. ყოველ წელს ზაფხულის სეზონზე ქობულეთში დამსვენებლების რაოდენობა მცირდებოდა...

რაც უნდა გვიმტკიცოს ხელისუფლებამ, რომ აჭარაში ტურისტების რაოდენობა იზრდება, ქობულეთში წლიდან წლამდე მხოლოდ მცირდება. გასული წელი კი ყველაზე წამგებიანი იყო. ასლან აბაშიძის დროსაც კი მეტი ტურისტი ჩამოდიოდა ქობულეთში, ვიდრე 2011 წლის ზაფხულში. ყველაფერმა ამან ქობულეთის მოსახლეობა მიიყვანა იმ დონემდე, რომ დაუგროვდათ უზარმაზარი დავალიანება ბანკებისა და მიკროსაფინანსო ორგანიზაციების წინაშე. ბანკებმა, როგორც კომერციულმა ორგანიზაციებმა, დაიწყეს ამ საქმეების სააღსრულებო ბიუროსთვის გადაცემა და მევალეებისთვის ვალში ჩადებული ქონების ჩამორთმევა. ზოგს უკვე ჩამოართვეს. მაგალითად, ბატონი გედენიძის ბინა უკვე იყიდება ვალში და ნერვიულობის ნიადაგზე ჯერ მისი და, შემდეგ კი მეუღლე გარდაიცვალა. არადა ეს ადამიანები ძირძველი ქობულეთელები არიან და მათთვის განსაკუთრებით რთულია, როდესაც ბანკი აიძულებს, დატოვონ მამაპაპისეული სახლ-კარი და მათ ქონებას ვიღაც ეპატრონება.

აღმოჩნდა, რომ გარკვეულ შემთხვევებში კორუფციულ სქემებთანაც გვაქვს საქმე. როგორც მითხრეს, ერთ-ერთ ქალს აუქციონზე გამოტანილი ექვსი სახლი შეუძენია. მეპატრონეებს უკვე აღარც ეკითხებიან და გამოსახლებისას აღმოაჩენენ ხოლმე, რომ გაყიდულია და სხვა მეპატრონე ჰყავს.

სხვათა შორის, 2008 წლის შემდეგ სახელმწიფომ დაიწყო იაფი სესხების გაცემა საოჯახო სასტუმროების მოსაწყობად, მაგრამ ამას იმდენად არაორგანიზებული და ქაოსური ხასიათი ჰქონდა, რომ დღესაც არავინ იცის, მათ შორის - ქობულეთის გამგეობამაც კი, ვისზე და რა ოდენობის იაფი სესხი გაიცა.

გამოსავალი ერთია, ამ შემთხვევაში სახელმწიფომ უნდა აიღოს პასუხისმგებლობა თავის თავზე, რადგან გასათვალისწინებელია მიზეზი, რის გამოც ჩავარდა ტურისტული სეზონი ქობულეთში და რომ ეს ფორსმაჟორული ვითარება იყო. თუ გვინდა, 300-მდე ოჯახი ქობულეთში გადარჩეს გამოსახლებას და საოჯახო ტიპის სასტუმროების ბიზნესი განვითარდეს, სახელმწიფომ უნდა გასცეს გრძელვადიანი, დაბალპროცენტიანი სესხი, რითაც ეს ხალხი შეძლებს დავალიანების დაფარვას. უკვე მიმართეს წერილით პრეზიდენტს, ასევე აჭარის ხელისუფლების თავმჯდომარეს, მაგრამ არავინ მათი ამბით არ დაინტერესებულა. თუ ხელისუფლება დატოვებს ამ ხალხს უყურადღებოდ, გარწმუნებთ, ქობულეთში ძალიან სერიოზულ პრობლემებთან გვექნება საქმე, რადგან ამ 300 ოჯახის უკან თითქმის მთელი ქალაქი დგას.

გასულ კვირას, გიორგი ტაკიძის ოჯახის გამოსახლების დროს, უამრავმა ადამიანმა მოიყარა თავი და შესაძლებლობა არ მისცეს სააღსრულებო სამსახურს სისრულეში მოეყვანათ სასამართლოს გადაწყვეტილება და ოჯახი სახლიდან ვერ გამოასახლეს. ხალხმა წინააღმდეგობა გაუწია სამართალდამცავებს. არ არის გამორიცხული, აჭარაში მეორე რევოლუცია ახლა ქობულეთიდან დაიწყოს, იმდენად რადიკალურად არის ადგილობრივი მოსახლეობა განწყობილი".