ბათუმში აფეთქების შედეგად რამდენიმე ოჯახი საცხოვრებელი ბინის გარეშე დარჩა. როგორც "ინტერპრესნიუსის" კორესპონდენტი ბათუმიდან იუწყება , გაზის გაჟონვის შედეგად მომხდარმა აფეთქებამ 4-სართულიანი კორპუსის მეორე და მესამე სართულის ბინები სერიოზულად დააზიანა. კედლები ნაწილობრივ ჩამოშლილი და დაბზარულია. ასევე, დაზიანებულია კორპუსის პირველ სართულზე განლაგებული მაღაზიები.
"სახლში არაფერი მთელი აღარ არის. კედლები სულ დაბზარულია, ოდნავ ხელი რომ მიაკარო, მთლად ჩაინგრევა. ინვალიდი შვილი მყავს. აფეთქების დროს ბავშვი სახლში იყო, როგორ გადარჩა, არ ვიცი", - ამბობს ლერმონტოვის ქუჩის ერთ-ერთი მცხოვრები.
ამასთან, როგორც "ინტერპრესნიუსთან" საუბრისას სამაშველო სამსახურის თანამშრომელმა, გენადი დავითაძემ აღნიშნა, აფეთქებას მსხვერპლი არ მოჰყოლია, დაშავდა რამდენიმე ადამიანი, მათ შორის - ერთი ბავშვიც.
"მოხდა გაზის აალება, რომელმაც გამოიწვია ბინის ნაწილობრივ ნგრევა. ამჟამად მიმდინარეობს სამაშველო-გაწმენდითი სამუშაოები", - აღნიშნა გენადი დავითაძემ.
ბათუმში, ლერმონტოვის ქუჩაძე მდებარე 4-სართულია სახლის მე-3 სართულზე აფეთქება დღეს მოხდა. საავადმყოფოში ამ დროისთვის ოთხი ადამიანი, მათ შორის ერთი ბავშვი რჩება.