საქართველოს ყველაზე ტიტულოვანმა გუნდმა, ქვეყნის 13-გზის ჩემპიონმა და 9-გზის თასის მფლობელმა თბილისის "დინამომ" ზედიზედ მეოთხე სეზონი ჩაამთავრა ოქროს მედლების გარეშე.

ამასთან, რომან ფიფიას მფლობელობაში გადასულმა "დინამომ" საკლუბო ანტირეკორდიც დაამყარა: აქამდე არასდროს მომხდარა, გუნდს სეზონი პირველ სამეულს მიღმა რომ დაემთავრებინოს. სხვათა შორის, 1994 წლის მერე არც ის ყოფილა, "დინამოს" ევროტურნირებზე რომ არ ეთამაშოს!

რა თქმა უნდა, ასეთი შედეგები არც კლუბის მეპატრონეს და არც გულშემატკივარს დააკმაყოფილებდა - 2011-2012 წლების საფეხბურთო სეზონში გუნდის მთავარი მწვრთნელის პოსტიდან ჯერ ესპანელი სპეციალისტი ალექს გარსია დაითხოვეს, შემდეგ მისმა მემკვიდრე გიორგი დევდარიანმა დატოვა თანამდებობა. სეზონი კი გუნდს დროებითმა თავკაცმა რამაზ მუმლაძემ ჩაამთავრებინა.

რომან ფიფია გუნდის შემადგენლობის განახლებაზე ჯერ კიდევ ჩემპიონატის დასრულებამდე ალაპარაკდა - ამბობდა, მოთამაშეთა მნიშვნელოვანი ჯგუფი დაგვტოვებსო.

ახლა ყველას აინტერესებს, რა ცვლილებები მოხდება ამ ზაფხულს თბილისის "დინამოში". ამის გასარკვევად  გაზეთი "ლელო" გუნდის გენერალურ დირექტორს სანდრო შახოვს ესაუბრა.

იხილეთ ვრცლად