ტელეკომპანია "მაესტროს" დამფუძნებელი მამუკა ღლონტი აცხადებს, რომ თუ მათი სატელიტური ანტენების დაყადაღებას "მაესტროს" დაჯარიმება მოჰყვება, ტელეკომპანია ჯარიმას არ გადაიხდის.

"პირდაპირ ვამბობ, ჩვენ ამ ჯარიმას არ გადავიხდით! მოვიდნენ, დააყადაღონ ჩვენი ანგარიშები და გამორთონ ჩვენი ტელევიზია, აი, მერე ვნახოთ, როგორ ჩაატარებენ ისინი არჩევნებს თანაბარ პირობებში. მე კატეგორიული წინააღმდეგი ვიქნები იმის, რომ რაიმე უკანონო ჯარიმა გადავიხადოთ. გამორთონ "მაესტრო" და მერე ვნახოთ, რა დასკვნებს დაუდებენ. იმიტომ, რომ XXI საუკუნეში ებრძოლო ინფორმაციის გავრცელებას, ეს არის წარმოუდგენელი რამ!", – განაცხადა მამუკა ღლონტმა.

მისივე თქმით, პროკურატურამ სატელიტური ანტენები უსაფუძვლოდ დააყადაღა და ისინი ანტენების უფასოდ დარიგებას არ გეგმავდნენ. ღლონტის განმარტებით, ანტენები შესაძლოა მოსახლეობისთვის განვადების წესით მიეყიდათ. "მაესტროს" დამფუძნებელი "ელიტა ბურჯთან" რაიმე სახის კავშირს კატეგორიულად გამორიცხავს.

თბილისის საქალაქო სასამათლომ პროკურატურის შუამდგომლობა ტელეკომპანია "მაესტროს" მიერ შემოტანილი ანტენების დაყადაღების მოთხოვნასთან დაკავშირებით დააკმაყოფილა. როგორც "ინტერპრესნიუსს" საქალაქო სასამართლოში განუცხადეს, მთავარმა პროკურატურამ შუამდგომლობით ყადაღის დადების თაობაზე სასამართლოს ელექტრონული წარმოების პროგრამით მიმართა და სასამართლომ აღნიშნული შუამდგომლობა ზეპირი მოსმენის გარეშე განიხილა და დააკმაყოფილა.

პროკურატურის განმარტებით, მათი ინფორმაციით, "მაესტრო" მოსახლეობისთვის ანტენების დარიგებას უსასყიდლოდ აპირებს.

"ინტერპრესნიუსი"