მომავალი პრემიერ-მინისტრი და ყოფილი შინაგან საქმეთა მინისტრი ივანე მერაბიშვილი მის ცხოვრებაში ყველაზე საუკეთესო წლებად შს მინისტრობას ასახელებს.

როგორც პარლამენტის რიგგარეშე სხდომაზე ივანე მერაბიშვილმა განაცხადა, იგი პასუხიმგებლობას იღებს ყველაფერზე რაც თქვა, რასაც აკეთებდა აქამდე და რასაც ამბობს ახლაც. მერაბიშვილმა აღნიშნა, რომ იღებს პასუხისმგებლობას შინაგან საქმეთა მინისტრობაზე, უფრო მეტიც ამაყობს, რომ ამ დროს მოუწია მუშაობა.

"მინდა გამოვიყენო ეს ტრიბუნა, ყველა დიდი ალბათობით აღარ ვიქნები შინაგან საქმეთა მინისტრი და მინდა ვთქვა, რომ ჩემს ცხოვრებაში ყველაზე კარგი წლები იყო შს მინისტრობა", - განაცხადა ივანე მერაბიშვილმა.

მერაბიშვილმა ასევე აღნიშნა, რომ ბაჩო ახალაიას ძალიან გაუჭირდება "მუშაობის შენარჩუნება", თუმცა არ დააკონკრეტა, რას გულისხმობდა. მისივე თქმით, ასევე დარწმუნებულია, რომ ბაჩო ახალია განავითარებს სტრუქტურას და დაამტკიცებს, რომ პოლიციაში გატარებული რეფორმა არის მტკიცე.

მერაბიშვილი ასევე დარწმუნებულია, რომ შს მინისტრის შეცვლა არაფერს შეცვლის და ხალხი დარწმუნდება, რომ ჰყავს ძლიერი პოლიციის ინსტიტუტი, რომელმაც განიცადა არნახული განვითარება და არის საამაყო თითოეული ქართველისა და პატრიოტისათვის.

"დარწმუნებილი ვარ, რომ პოლიცია კვლავაც იქნება ერთ-ერთი დასაყრდენი ქართული რეფორმის, საქართველოს სტაბილურობის და განვითარების", - განაცხადა ივანე მერაბიშვილმა.

"ინტერპრესნიუსი"