საპარლამენტო არჩევნებთან დაკავშირებით, საქართველოს ხელისუფლებამ საერთაშორისო დამკვირვებლებს მიწვევა უკვე გაუგზავნა. საქართველოს საგარეო სამინისტროს ინფორმაციით, საქართველოში დამკვირვებლის გამოსაგზავნად სპეციალური განაცხადი უკვე 50-მდე ქვეყანას გაეგზავნა.

"მოწვევა ეუთოს სადამკვირვებლო მისიას ჯერ კიდევ 7 თვის წინ გავუგზავნეთ. გარდა ამისა, მოსაწვევები გვაქვს გაგზავნილი 50-მდე სხვადასხვა ქვეყნის დამკვირვებლისთვის. ძალიან ბევრი ქვეყნისგან დადასტურებული გვაქვს, რომ ისინი არჩევნებს დააკვირდებიან.

"ასევე მნიშვნელოვანია, რომ იქნება ეუთოს სადამკვირვებლო მისია, რომელიც ძალიან მალე გამოგზავნის გრძელვადიან შემდეგ კი - მოკლევადიან დამკვირვებლებს. ასევე სხვადასხვა საერთაშორისო ორგანიზაციების, მათ შორის საპარლამენტო ასამბლეების, ევროპარლამენტის, ნატოს საპარლამენტო ასამბლეის, ევროკავშირის წარმომადგენლები იქნებიან წარმოდგენილები", - განაცხადა საქართველოს საგარეო საქმეთა მინისტრის მოადგილემ სერგი კაპანაძემ.

იმსახურებს თუ არა ნდობას საერთაშორისო სადამკვირვებლო მისიები, ამ კითხვით საზოგადოების წარმომადგენლებს მივმართეთ.

ლანა ღოღობერიძე  (რეჟისორი): "უნდა ვენდოთ. თუმცა მნიშვნელოვანია, რომ ჩვენც ჩავაყენოთ ისეთ სიტუაციაში, რომ სამართლიანები იყვნენ.

ზოგადად საერთაშორისო ნორმებს უნდა დავემორჩილოთ, სხვანაირად არ შეიძლება, თორემ იზოლაციაში მოვექცევით. ჩვენ გვინდა, რომ ვიყოთ ცივილიზებული საერთაშორისო თანამეგობრობის წევრები, ამიტომ ყველა საერთაშორისო კანონმდებლობა, რომელიც აღიარებულია მსოფლიოში, უნდა დავემორჩილოთ, მათ შორის სადამკვირვებლო მისიებსაც.

რა შეფასებას დადებენ არჩევნებზე, წინასწარ ამის თქმა არ შემიძლია, თუმცა ყოფილა შემთხვევები, რომ მათი შეფასებით არ ვყოფლივარ კმაყოფილი.

ვფიქრობ, ამჯერად ყველაფერი ხალხზე იქნება დამოკიდებული. რამდენად ბევრი ხალხი მივა საარჩევნო უბნებთან და დაინახავს თუ არა თანამეგობრობა მათ ნება - სურვილს".

დავით მაღრაძე (პოეტი): "უნდობლობას არავის არ ვუცხადებ, მაგრამ ქართული საზოგადოება უნდა ენდოს, პირველ რიგში, საკუთარ თავს. ხმები ჩვენ თვითონ უნდა დავიცვათ.

მართალია, წინა წლების გამოცდილება საერთაშორისო ორგანიზაციებთან დაკავშირებით არის ნეგატიური - 2008 წლის არჩევნები დადებითად შეაფასეს და დიდი დარღვევები ვერ შეამჩნიეს, მაგრამ ახლა საქართველოს მოსახლეობაა თვითონ მობილიზებული.

სადამკვირვებლო მისიები კი უფრო მეტ ყურადღებას, პატივისცემას იჩენენ მაშინ, როდესაც მოსახლეობა მოწოდების სიმაღლეზე დგას და საკუთარ ხმას იცავს. ამიტომ ჩვენი საქმე არის, უპირველეს ყოვლისა, თანადგომა, საკუთარი ხმების დაცვა.

ლადო ვარდოსანიძე  (არქიტექტორი): "წინა გამოცდილებით მაინცდამაინც დიდ ნდობას არ ბადებს მათი მოღვაწეობა, მაგრამ ვფიქრობ, რომ ვითარება შეიცვალა. დღეს გამჭირვალე არჩევნების მომხრე ძალინ ბევრია დასავლეთშიც და ჩვენს ქვეყანაშიც, ასე რომ, ამ მხრივ სასიკეთოდ არის ვითარება შეცვლილი და უნდა ვენდოთ მათ".

გოგი თორაძე (რეჟისორი): "ალბათ უნდა ვენდოთ, სხვანაირად არ გამოდის. იმიტომ რომ ისინი ხომ ერთი ქვეყნიდან არ ჩამოდიან. თან სხვა გზაც არ გვაქვს, მეტი რა უნდა გავაკეთოთ. მთელ მსოფლიოშია ეს პრაქტიკა მიღებული, ვიღაცა რაღაცას აკვირდება, ერთი ადამიანი რომ იყოს, რთული იქნებოდა ამაზე საუბარი, მაგრამ ახლა ბევრი ქვეყნიდან გვეყოლება დამკირვებელი. ყველა ერთად ხომ არ შეცდება?! შეიძლება სხვადასხვა დასკვანა დაიდოს, თუმცა ამ შემთხვევაში უმრავლესობას უნდა ვენდოთ. ერთი ადამიანი შეიძლება შეცდეს და ასი - არა. ხოლო თუ მოხდა რაღაც ცდომილება და ეს რამდენიმემ თქვა, მაშინ უნდა დავფიქრდეთ რაღაცაზე.