მსახიობ გიორგი ფოჩხუას მკვლელობაში ეჭვმიტანილი ბექა ცობეხია გალის რაიონის სოფელ ბარღებიდან დედამ, რიმა ცხაკაიამ გადმოიყვანა და სამართალდამცავებს ჩააბარა, - ამის შესახებ ინფორმაციას სამეგრელოს მედია ორგანიზაცია "სმო.გე" ავრცელებს.

მთელი ღამის განმავლობაში მიმდინარეობდა ბექა ცობეხიას დაკითხვა ზუგდიდის პოლიციის მთავარ სამმართველოში.
რეგიონული მედიასაშუალების ცნობით, ბექა ცობეხიას გალის რაიონში გადასვლაში ბიძა, დიმა ცხაკაია დაეხმარა, რომელიც აფხაზ კრიმინალებთან და ე.წ მილიციასთან დაახლოებული პირია. დიმა ცხაკაია ოჩამჩირის რაიონის სოფელ ჯგერდაში ცხოვრობს.

"სმო.გე"-ს ინფორმაციით, ბექა ცობეხია თავდაპირველად სწორედ ცხაკაიამ შეიფარა.
მსახიობი გიორგი ფოჩხუა 13 ივლისს დაიღუპა. გარდაცვლილის ოჯახი მისი მკვლელობის ვერსიაზე საუბრობს.
"გიორგი ფოჩხუა მოკლეს და ზღვაში შემდეგ გადააგდეს. ძიების ინტერესებიდან გამომდინარე ეჭვმიტანილის ვინაობას ვერ დაგისახელებთ და მომხდარ ტრაგედიასთან დაკავშირებით სამართალდამცავები კომენტარს თავად გააკეთებენ", - ამის შესახებ გიორგი ფოჩხუას დამ, ელენე ფოჩხუამ "ინტერპრესნიუსს" ზუგდიდიდან სატელეფონო საუბრისას განუცხადა.

მისივე თქმით, მას მხოლოდ იმის თქმა შეუძლია, რომ გიორგი მეგობრებთან ერთად ანაკლიაში იმყოფებოდა. ზუგდიდისკენ მობრუნებულებს გზად გიორგის მამაკაცი გამოელაპარაკა და ძველი ნაცნობობა შეახსენა.

"თავი შეახსენა. რომელიღაც რესტორნის მეპატრონე ყოფილა. მეგობრები მოშორებით იდგნენ და გიორგის დაურეკეს, რომ ეჩქარა სახლში წასასვლელად. გიორგიმ უპასუხა, რომ 5 წუთში დაგეწევითო; მას შემდეგ ტელეფონს აღარ პასუხობდა", - განაცხადა ელენე ფოჩხუამ.

გარდაცვლილის დის ინფორმაციით, მიცვალებულს სახეზე დაზიანებები აღენიშნება. მისივე მოსაზრებით, გიორგი ფოჩხუა ჯერ ცემეს, მოკლეს, მერე ტანზე გახადეს და ზღვაში გადააგდეს.