როგორც თბილისის მერმა გიგი უგულავამ, თბილისში "ნაციონალური მოძრაობის” მაჟორატირობის კანდიდატების წარდგენისას განაცხადა, „”ნაციონალური მოძრაობის” კრედო ან გნებავთ დოქტრინა, მდგომარეობს შემდეგში: არ დავუშვათ წარსულის დაბრუნება , არ დავუშვათ აშენებულის დანგრევა, არასოდეს დავუჩოქოთ მტერს და მეტი სარგებელი მოვუტანოთ ხალხს."

"ხალხი დაფიქრდება, რა სარგებლობას მოუტანს "ნაციონალური მოძრაობა” მომავალი 4 წლის განმავლობაში ჩვენს ქვეყანას და ხალხს და საზოგადოება ამ სულისკვეთებით გააკეთებს არჩევანს. ჩვენი ამოცანაა, მეტი სარგებელი ჩვენი საზოგადოებისთვის, რაც ნიშნავს უკეთეს ჯანდაცვას, გაძლიერებულ სოფელს და დასაქმებულ ჩვენს თანამოქალაქეებს. ეს არის რთული, მაგრამ შესრულებადი ამოცანა, განსაკუთრებით კი იმ პრობებში, როდესაც ამ ყველაფერს წინაპირობად უდევს ცენტრალური და ადგილობრივი ხელისუფლების ერთიანობა. არის თუ არა საქართველო უკეთესი ქვეყანა, ვიდრე იყო 8 წლის წინ? არის თუ თბილისი უკეთესი ქალაქი, ვიდრე იყო 8 წლის წინ და პრობლემების მიუხედავად არის თუ არა ჩვენი მოქალაქეების ცხოვრება დღეს უკეთესი, ვიდრე იყო 8 წლის წინ? ამაზე დადებითი პასუხი აქვს ჩვენი მოსახლეობის უმრავლესობას, უფრო მეტს, ვიდრე "ნაციონალური მოძრაობის” მხარდამჭერია, ეს კი იმას ნიშნავს, ჩვენ მოქალაქეებს არ სურთ წარსულში დაბრუნება, წარსულზე ოცნება, ეს ნიშნავს იმას, რომ ჩვენი ხალხი არ დაუშვებს აშენებულის დანგრევას, რომ ჩვენ ხალხს კარგად ესმის ის გამოწვევები და საფრთხეები, რომელიც ჩვენი ქვეყნის გარშემოა, მაგრამ არასდროს დათმობს თავისუფლებას. ეს ნიშნავს იმას, რომ ჩვენი ხალხი ხედავს განვითარებას, მაგრამ სამართლიანად მოითხოვს კიდევ უფრო მეტს”, – განაცხადა გიგი უგულავამ.