ბრიტანელი დელვარ სინგხო, რომელიც საკვები პროდუქტების მწარმოებელ ქარხანაში მენეჯერად მუშაობდა, ცოლქმრული ღალატის აღკვეთის მიზნით, ცოლს რეგულარულად საკვებში სტეროიდებს უყრიდა.

შედეგად ქალი საშინლად გასუქდა, დაიწყო გამელოტება, ნიკაპზე, ზედა ტუჩსა და ზურგზე თმა ამოუვიდა.

ეს გარეგნული მეტამორფოზები ჯასპრიტ სინგხ ჯილს 2010-დან 2011 წლამდე ემართებოდა. ქალი ხშირად ჩიოდა საჭმლის მწარე გემოზე, მაგრამ ქმარი ჯასპრიტს აიძულებდა, კერძი ბოლომდე ეჭამა იმ მიზეზით, რომ საყვარელი ქმრის მიერ მომზადებულ სადილზე უარის თქმა ცოლისგან უპატივცემულობის ნიშანი იქნებოდა.

სიმართლე სრულიად შემთხვევით გაირკვა. ჯასპრიტის 15 წლის გოგონამ შემთხვევით დაინახა, როგორ უყრიდა მამა დედას საჭმელში წამალს. ბავშვმა, რა თქმა უნდა, ყველაფერი დედას უამბო. გაცეცხლებულმა ქალმა სამზარეულოს კარადის კარი გატეხა და ქიმიური პრეპარატები აღმოაჩინა.

რა თქმა უნდა, მაშინვე პოლიცია გამოიძახა. ეჭვიან ქმარს ერთი წლით თავისუფლების აღკვეთა და 2 წლით შინაპატიმრობა მიუსაჯეს. სასამართლოსთან მამაკაცმა თავისი საქციელი იმით ახსნა, რომ არ სურდა, რქებდადგმული ქმრის როლში აღმოჩენილიყო. მისი აზრით, იდეალური ცოლი სახლში უნდა მჯდარიყო, მიეხედა ოჯახისთვის და შვილების აღზრდაზე ეზრუნა.

"დელვარ სინგხი ცოლზე ფსიქოლოგიურ ზეგავლენას ახდენდა. ქალი გამუდმებით ქმრის მეთვალყურეობის ქვეშ იმყოფებოდა; ცოლს არ ჰქონდა მუშაობის უფლება და დამოუკიდებლად ტანსაცმლის არჩევის საშუალებაც. ამასთან, დელვარი გამუდმებით ღალატში სდებდა ცოლს ბრალს." - განაცხადა სასამართლოზე ერთ-ერთმა მოწმემ.

სპეციალისტების მტკიცებით, ეჭვიანობის ფსიქოლოგიის საფუძველში დევს შიში, საკუთარ თავში რწმენის არქონა, პარტნიორისადმი უნდობლობა, ეჭვი მის ერთგულებასა და საიმედოობაზე. ეჭვიანობის ნიადაგზე ადამიანი ხდება გაუწონასწორებელი, იწყებს პარტნიორის ყოველი ნაბიჯის კონტროლს.

ეჭვიანობის გრძნობისგან გათავისუფლების ერთადერთი საშუალებაა: საყვარელი ადამიანი უნდა გაუშვა, მისცე თავისუფლება. თუ ის დაბრუნდა, ესე იგი, ეს ბედია; თუ თავისუფლება არჩია - ეს იმას ნიშნავს, რომ ის არც არასოდეს ყოფილა თქვენი.