საინფორმაციო პორტალ "ამბები.გე"-ზე ჩატარებული გამოკითხვის მონაწილეთა უმრავლესობა წლის პოლიტიკოსად პრემიერ-მინისტრ ბიძინა ივანიშვილს მიიჩნევს. მას ხმათა 46.5% ხვდა წილად. რეიტინგში მეორე ადგილი თავდაცვის მინისტრმა ირაკლი ალასანიამ დაიკავა. ალასანიას წლის პოლიტიკოსად გამოკითხულთა 12.6% მიიჩნევს. სამეულს ხმათა 7.3% პრეზიდენტი მიხეილ სააკაშვილი აგვირგვინებს.

     ახმეტის რაიონის მაჟორიტარი დეპუტატის,  ზურაბ ზვიადაურის სახლს ახალი წლის ღამეს ავტომატიდან ესროლეს. როგორც ზვიადაურმა "ინტერპრესნიუსს" განუცხადა, შემთხვევა ახალი წლის ღამეს, დაახლოებით 01.00-დან 01.30 საათამდე მოხდა. სროლა განხორციელდა სახლის საძინებელი ოთახის ფანჯარაზე. შენობას 13 ტყვია აქვს მოხვედრილი. საბედნიეროდ არავინ დაშავებულა.

   2013 წლის 1-ელი იანვრიდან საქართველო სუამ-ის თავმჯდომარე ქვეყანა ოფიციალურად გახდა. მანამდე კი, გასული წლის 7 დეკემბერს, დუბლინში, ეუთო-ს საგარეო საქმეთა მინისტრების საბჭოს მე-19 სხდომის ფარგლებში, გაიმართა დემოკრატიისა და ეკონომიკური განვითარების ორგანიზაცია - სუამ-ის საგარეო საქმეთა მინისტრების საბჭოს მე-20 სხდომა. სხდომაზე მხარეებმა განიხილეს სუამ-ის ფარგლებში მიმდინარე აქტუალური საკითხები, კერძოდ, პოლიტიკური ურთიერთქმედების, უწყებათაშორისი და ორგანიზაციის პარტნიორებთან თანამშრომლობის მიმართულებით.

    შინაგან საქმეთა სამინისტრო საპატრულო პოლიციის პატრულ-ინსპექტორ გიორგი თექთუმანიშვილის გარდაცვალების გამო ღრმა მწუხარებას გამოთქვამს .
შსს-ს ინფორმაციით, თბილისში, 2013 წლის 2 იანვარს, დაახლოებით, 01:15 საათზე, შეშელიძის ქუჩაზე, №31 ელგანათების ბოძის მიმდებარედ, ავტომობილი "ბმვ 528" ასფალტის მოყინულ ზედაპირზე მოცურდა, დაკარგა მართვა და სამსახურებრივი მოვალეობის შესრულების პროცესში ქვეითად მყოფ თბილისის საპატრულო პოლიციის პატრულ-ინსპექტორ გიორგი თექთუმანიშვილს და ასევე ქვეითად მყოფ მოქალაქე გიორგი გიგაურს დაეჯახა, რის შემდეგაც, "ბმვ"-ს მძღოლი შემთხვევის ადგილიდან მიიმალა.