Tbilisi Time
სასამართლომ პროკურატურის შუამდგომლობა არ დააკმაყოფილა და ირაკლი ოქრუაშვილს აღკვეთის ღონისძიება - პატიმრობა გირაოთი არ შეუცვალა , - ამის შესახებ "ქართული პარტიის" პრესსამსახურის მიერ გავრცელებულ განცხადებაშია აღნიშნული. პარტიის ცნობით, პროკურატურამ დღეს სასამართლოს ფინანსთა სამინისტროს საგამოძიებო სამსახურში ფულის გათეთრების ეპიზოდზე მიმდინარე საქმეზე, ირაკლი ოქრუაშვილისთვის აღმკვეთი ღონისძიების გირაოთი შეცვლის წინადადებით მიმართა.
"მოსამართლემ პროკურატურის კანონიერი მოთხოვნა არ დააკმაყოფილა და ოქრუაშვილი პატიმრობაში დატოვა. ამ კონკრეტული ბრალდებით მას პატიმრობის ორთვიანი ვადა 7 იანვარს ეწურება. მანამდე, 31 დეკემბერს პროკურატურამ თბილისის საქალაქო სასამართლოს ოქრუაშვილისთვის აღმკვეთი ღონისძიების ერთი თვით გაგრძელების მოთხოვნით მიმართა, მაგრამ რადგან დაკავების ოქმი არ იქნა წარმოდგენილი, მოსამართლემ დაკავების ვადის გამოთვლა ვერ შეძლო და პროკურატურის მოთხოვნა არ დააკმაყოფილა", - აღნიშნულია პარტიის მიერ გავრცელებულ განცხადებაში.
"ქართული პარტიის" პრესსამსახურის ცნობითვე, ამავე საქმეზე ბრალდებული პირები შეყვანილი არიან პარლამენტის მიერ დამტკიცებულ პოლიტპატიმართა და პოლიტდევნილთა სიაში და ამინისტიის კანონის ამოქმედებისთანავე მათზე სისხლის სამართლებრივი დევნა შეწდება.
ირაკლი ოქრუაშვილთან დაკავშირებულ სხვა ეპიზოდებზე სასამართლო პროცესები 9, 10 და 11 იანვარს არის ჩანიშნული.
