საქართველოს ეროვნული ნაკრები, 2014 წლის მსოფლიო
ჩემპიონატის შესარჩევ მატჩში დღეს ესპანეთის ნაკრებს უმასპინძლებს.
შეხვედრა "დინამო არენაზე" 21:30 საათზე დაიწყება.
საქართველოს
ნაკრების მთავარი მწვრთნელის, თემურ ქეცბაიას განცხადებით, გუნდში
ერთადერთი პრობლემა ჯანო ანანიძის ავადმყოფობაა, რომელიც მოედანზე საწყისი
წუთებიდან გასვლას ვერ შეძლებს.
ამასთან, როგორც ქეცბაიამ გუშინდელ
პრესკონფერენციაზე აღნიშნა, საქართველოს ნაკრების ფეხბურთელები ყველაფერს
გააკეთებენ, რომ ქართველ ხალხს კიდევ ერთი საჩუქარი გაუკეთონ.
"ესპანეთი
დღეს საუკეთესო გუნდია და, რა თქმა უნდა, ადვილი თამაში არ იქნება. ვიცით,
რომ ძნელი თამაში გვექნება, თუმცა ვიცით, რომ თუ ჩვენ დავდგებით ერთად,
ვეცდებით კარგი შედეგი მივიღოთ. ჩვენთვის მისაღები შედეგი კი არწაგებაა", -
განაცხადა თემურ ქეცბაიამ.
მისივე თქმით, გუნდი ფსიქოლოგიურად სრულიად მზად არის. "ბიჭებს ვუთხარი,
რომ გამოვიდნენ და მოიხსნან ყველა კომპლექსი. დასაფასებელი გუნდია
ესპანეთი, მაგრამ ზედმეტად დაფასება არც ერთი მეტოქის არ ვარგა. ესპანეთთან
თამაში ძალიან დიდი სტიმულია ახალგაზრდებისთვის, რადგან ამ თამაშს მთელი
მსოფლიო უყურებს და თუ ისინი თავს კარგად წარმოაჩენენ, სამომავლოდ უკეთ
კლუბში შეეძლებათ თამაში", - განაცხადა თემურ ქეცბაიამ.
ესპანეთის
ნაკრების მთავარი მწვრთნელის, ვისენტე დელ ბოსკეს განცხადებით კი,
საქართველო სერიოზული მეტოქეა და ესპანელი ფეხბურთელები დღევანდელი
მატჩისთვის საკმაოდ მოტივირებულები არიან.
ამასთან, როგორც ესპანეთის
ნაკრების კაპიტანმა იკერ კასილიასმა გუშინ გამართულ პრესკონფერენციაზე
აღნიშნა, საქართველოსთან თამაშისთვის ნაკრები ძალიან მოტივირებულია.
"ჩვენ
სურვილი გვაქვს, რომ ეს შეხვედრა წარმატებით დავასრულოთ. ძალიან
საინტერესო თამაში გამოვა. მატჩი ძალიან მნიშვნელოვანია და აქ გამარჯვება
წინ გადადგმული ნაბიჯი იქნება მსოფლიოს ჩემპიონატზე მოსახვედრად. ჩვენ სამ
ქულას ვგეგმავთ", - განაცხადა იკერ კასილიასმა.
მისივე თქმით, ესპანელები ქართველი ფეხბურთელებიდან სამ ფეხბურთელს გამოყოფენ.
"ეს არის ლორია, ანანიძე და ოქრიაშვილი. ჩვენ ვნახეთ მათი თამაში და მათ გამოვარჩევდით", - აღნიშნა კასილიასმა.
|
Tbilisi Time
