საბერძნეთის პოლიციამ ბავშვებით ვაჭრობაში ეჭვმიტანილი ქართველი ქალი დააკავა. 58 წლის ქალბატონი სამართალდამცავებმა ქალაქ სალონიკში აიყვანეს. იგი, როგორც არასრულწლოვნების გატაცებასა და საზღვარგარეთ გაყიდვის მცდელობაში ეჭვმიტანილი, რუსეთის შსს-ს მიერ ძებნილად იყო გამოცხადებული.
საბერძნეთის პოლიციის მონაცემებით, რუსეთის ხელისუფლება მას კრასნოდარის მხარეში ჩადენილი დანაშაულებების გამო ეძებდა.

დაკავებულის მოქალაქეობა ამ დროისთვის დადგენილი არ არის. ცნობილია მხოლოდ ის, რომ დამნაშავე ეროვნებით ქართველია და საბერძნეთში არალეგალურად იმყოფებოდა.
ჯერჯერობით არც ბერძენ სამართალდამცავებს და არც დაკავებულს რუსეთის საელჩოსთვის არ მიუმართავთ.