სტუდენტური გაერთიანება "ლაბორატორია 1918"-ის წევრ სანდრო ცაგარელისთვის დაკისრებულ ჯარიმას ცისანა სეფიაშვილი გადაიხდის.

ამის შესახებ მომღერალმა განცხადება დღეს ფონდ "ქომაგში" გამართულ პრესკონფერენციაზე გააკეთა. პრესკონფერენციას ფონდის ხელმძღვანელი ია მეტრეველი და დაჯარიმებული სტუდენტი სანდრო ცაგარელიც ესწრებოდნენ.

ფონდმა "ქომაგმა" მშვიდობიანი აქციის დროს დაჯარიმებულ მოქალაქეებს მხარდაჭერა 25 სექტემბერს გამოუცხადა და დახმარებას დაპირდა.

ფონდის განცხადებას მოგვიანებით სამოქალაქო საზოგადოების წარმომადგენლებიც გამოეხმაურნენ. ერთ-ერთი მათგანი ცისანა სეფიაშვილი იყო, რომელიც ცაგარელისთვის დაკისრებულ 400 ლარის ოდენობის ჯარიმას გადაიხდის.

ამასთან, ფონდის წარმომადგენლებმა დღევანდელ პრესკონფერენციაზე კიდევ ერთხელ დააფიქსირეს მათი პოზიცია, რომ მზად არიან მშვიდობიანი გამოსვლების დროს დაჯარიმებულ მოქალაქეებს ფინანსურად დაეხმარონ.

სტუდენტური გაერთიანება "ლაბორატორია 1918"-ის წევრ ალექსანდრე ცაგარელს თბილისის საქალაქო სასამართლომ 400 ლარიანი ჯარიმა ადმინისტრაციულ სამართალდარღვევათა კოდექსის 166 და 173 მუხლის საფუძველზე დააკისრა, რომელიც წვრილმან ხულიგნობას და დაუმორჩილებლობას გულისხმობს.