ბრიტანეთის პარლამენტის წევრი დენის მაკშეინი სააკაშვილს ურჩევს, დახმარებისათვის ევროკავშირს მიმართოს. ამის შესახებ მაკშეინმა სტატია ბრიტანულ გამოცემა Newstatesman- ში გამოაქვეყნა, სადაც საქართველოში მიმდინარე მოვლენების ერთგვარ პოლიტიკურ ანალიზს გვთავაზობს.
"საერთაშორისო ნდობის აღსადგენად სააკაშვილმა უნდა მიმართოს ევროკომისიას ან ევროპის საბჭოს სპეციალური კომისიის შექმნის თხოვნით, რომელიც ჯეროვნად გამოიძიებს ქართველ პატიმართა წამების საშინელ ფაქტებს, რაც ასახულია ვიდეოში", - აცხადებს იგი.
მაკშეინი ვრცლად მიმოიხილავს ასევე მთავრობისა და ოპოზიციური ძალების დაპირისპირებას.
"სააკაშვილის საპრეზიდენტო ვადა 2013-ში მთავრდება და თითქმის ყოველი საერთაშორისო რანგის სტუმარი, ჩემი ჩათვლით, ეუბნება, რომ არ უნდა გაიმეოროს პუტინის სცენარი, რათა გაგრძელდეს ქართულ პოლიტიკაში მისი ათწლიანი დომინირება. თუმცა, უნდა გახდეს თუ არა ზღაპრულად მდიდარი ოლიგარქი ბიძინა ივანიშვილი მისი მემკვიდრე, ეს ღია საკითხად რჩება", - წერს ბრიტანელი დეპუტატი.
ბრიტანელი პარლამენტარის აზრით, რომელიც წარსულში ქვეყნის ევროპის მინისტრიც გახლდათ, სკანდალურმა ვიდეომ კიდევ უფრო დაამძიმა ქვეყანაში არსებული ისედაც დაძაბული სიტუაცია - "მიუხედავად იმისა, რომ საქართველოში არსებული სიტუაცია ახლოსაც ვერ მივა იმასთან, რაც ხდება რუსეთში, ამ ვიდეომ ცხადყო, თუ კიდევ რამდენია გასაკეთებელი საქართველოში, რომელიც აცხადებდა რომ საბოლოოდ შეწყვიტა წარსულის მანკიერი პრაქტიკა".
"ყოველი ერი ფასდება იმით, თუ როგორ ეპყრობიან იქ მოქალაქეებს და განსაკუთრებით, ტუსაღებს. ვიდეომ აჩვენა, რომ საქართველომ ვერ გაიარა ეს გამოცდა და კარგი იქნებოდა, თუ ყველა პოლიტიკოსი - მიუხედავად პოლიტიკური პლატფორმისა- რომლებიც ერთმანეთს ძალაუფლებისათვის ებრძვიათ, შეჩერდებოდა და დაუფიქრდებოდა იმას, თუ რა უნდა გაკეთდეს იმისათვის, რომ ქართული სინამდვილე სრულად შეესაბამებოდეს ადამიანის უფლებათა ევროპულ კონვენციას",- წერს დენის მაკშეინი. 
|
Tbilisi Time
