რუსეთის საგამოძიებო კომიტეტმა გივი თარგამაძის მიერ რუსეთში მასობრივი არეულობის დაფინანსების დამადასტურებელი მასალა აღმოაჩინა , - ამის შესახებ საგამოძიებო კომიტეტის ოფიციალურ ვებგვერდზე განთავსებულ განცხადებაშია ნათქვამი. 
კერძოდ, უწყების ცნობით, დადგენილია, რომ 2012 წლის გაზაფხულზე ლიტვაში ჩატარდა სემინარი "ფერადი" რევოლუციების მაგალითზე ხელისუფლების მიტაცების საკითხებთან დაკავშირებით, რომელშიც რუსეთის გარდა სხვა ქვეყნების წარმომადგენლებიც მონაწილეობდნენ. 
სისხლის სამართლის საქმის თანახმად, სემინარში მოსკოვიდან მონაწილეობდნენ ანა კორნილოვა, ტაისია ალექსანდროვა და იური ნაბუტოვსკი. 
"იქიდან გამომდინარე, რომ არსებობდა ვარაუდი აღნიშნული პირების საცხოვრებელ სახლებში გამოძიებისთვის საინტერესო საგნებისა და დოკუმენტების არსებობის შესახებ, სასამართლოს დადგენილების საფუძველზე სამივე მათგანის ბინაში ჩხრეკა ჩატარდა. ჩხრეკის შედეგად ამოღებულია ინფორმაციის ელექტრონული მატარებლები, ასევე სისხლის სამართლის საქმისთვის მნიშვნელოვანი საგნები და დოკუმენტები. ის პირები, კი რომელთა სახლებშიც ჩხრეკა ჩატარდა, საგამოძიებო კომიტეტში მოწმის სტატუსით დაკითხვაზე იმყოფებიან", - ნათქვამია საგამოძიებო კომიტეტის განცხადებაში. 
სერგეი უდალცოვის, ლეონიდ რაზვოზჟაევის და კონსტანტინე ლებედევის წინააღმდეგ სისხლის სამართლის საქმე "სააკაშვილის მთავრობიდან მიღებული დაფინანსებით მასობრივი არეულობის ორგანიზების" ბრალდებით აღიძრა. საუბარია ვიდეოჩანაწერზე, რომელიც რუსულ ტელეარხ НТВ-ზე გავრცელდა და რომელიც "მემარცხენე ფრონტის" ლიდერის გივი თარგამაძესთან შეხვედრას ასახავს. 
"მინსკში ფარულად ჩაწერილ ვიდეოში ნაჩვენებია, როგორ მსჯელობენ თარგამაძე, უდალცოვი და ოპოზიციის რამდენიმე წარმომადგენელი სახელმწიფო გადატრიალების გეგმაზე. კერძოდ, ვიდეოში ლაპარაკია რუსეთის რამდენიმე ქალაქზე, მათ შორის კალინინგრადზე ოპოზიციური კონტროლის დაწესებაზე", - წერს რუსული მედია. 
ბრალის დამტკიცების შემთხვევაში უდალცოვს 10 წლამდე პატიმრობა ემუქრება.