მთავარი » 2012»ნოემბერი»14 » რასმუსენმა აღნიშნა, რომ ნატო ახალი მთავრობის ყველა ნაბიჯს გაგებით და ნდობით მოეკიდება
06:55
რასმუსენმა აღნიშნა, რომ ნატო ახალი მთავრობის ყველა ნაბიჯს გაგებით და ნდობით მოეკიდება
ნატო ქართულ ჯარში არსებული ვითარების შესასწავლად სამუშაო ჯგუფის შექმნას საჭიროდ არ მიიჩნევს და საქართველოს ახალ მთავრობას ნდობას უცხადებს, - ამის შესახებ საქართველოს პრემიერ-მინისტრმა, ბიძინა ივანიშვილმა ბრიუსელში, ჩრდილოატლანტიკური ალიანსის გენერალურ მდივან ანდერს ფოგ რასმუსენთან შეხვედრის შემდეგ გამართულ ერთობლივ პრესკონფერენციაზე განაცხადა. ივანიშვილის განმარტებით, რასმუსენმა აღნიშნა, რომ ნატო საქართველოს ახალი მთავრობის ყველა ნაბიჯს გაგებით და ნდობით მოეკიდება. "ორივე მხრიდან გამოვხატეთ მწუხარება იმ მოვლენებთან დაკავშირებით, რომელიც საქართველოში განვითარდა. მხედველობაში მაქვს დაპატიმრებები. მე შევთავაზე გენერალურ მდივანს, ნებისმიერი ფორმით მიიღონ ამ პროცესში მონაწილეობა, რომ ყველაფერი იყოს გამჭვირვალე და გასაგები. ჩვენდა სასიამოვნოდ, ბატონმა რასმუსენმა მკვეთრი ნდობა გამოგვიცხადა, ეს არ ჩათვალა საჭიროდ და აღნიშნა, რომ ყველა ჩვენს ნაბიჯს გაგებით და ნდობით მოეპყრობა. ასეთი იყო მისი პოზიცია ამ საკითხთან დაკავშირებით", - განაცხადა ბიძინა ივანიშვილმა. ამასთან, საქართველოს პრემიერის განმარტებით, შეხვედრამ საინტერესოდ ჩაიარა და მასზე სხვა უამრავი საკითხიც იქნა განხილული. "საინტერესო შეხვედრა გვქონდა. მასზე კიდევ ერთხელ გამოიკვეთა, რომ საქართველომ 1-ელი ოქტომბრის არჩევნებით ძალიან მნიშვნელოვანი ტესტი ჩააბარა, ძალიან საინტერესო გზავნილი მივეცით საერთაშორისო თანამეგობრობას და ნატო-ს წევრ ქვეყნებს. შესაბამისად, ბატონი რასმუსენისგან მივიღეთ დაპირება, რომ დეკემბერში დაგეგმილ საგარეო საქმეთა მინისტერიალზე, რომელზეც ჩვენი მხირდანაც იქნებიან წარმომადგენლები, აუცილებლად გაკეთდება კარგი აქცენტი ამასთან დაკავშირებით და აღინიშნება, რომ საქართველომ არჩევნებით ძალიან დიდი გამოცდა ჩააბარა", - განმარტა საქართველოს პრემიერ-მინისტრმა. გარდა ამისა, მისივე თქმით, შეხვედრაზე ნატო-ს სამხედრო კომიტეტის ვიზიტის გადადების გამო წუხილიც გამოთქვა, თუმცა გენერალური მდივნისგან დაპირება მიიღო, რომ ვიზიტი საქართველოში აუცილებლად შედგება. "დიდი წუხილი გამოვთქვი სამხედრო კომიტეტის ვიზიტის გადადებასთან დაკავშირებით. ბატონმა გენერალურმა მდივანმა დამარწმუნა, რომ ეს საკითხი უახლოეს მომავალში ისევ განიხილება და კომიტეტის ვიზიტი საქართველოში აუცილებლად შედგება. ამავდროულად, მე პირადად დავპატიჟე ჩრდილოატლანტიკური საბჭოს წევრები საქართველოში, რომელიც კიდევ უფრო გაამყარებს ჩვენს ინტეგრაციას ნატო-ში", - განაცხადა ივანიშვილმა. ერთობლივ პრესკონფერენციაზე საქართველოს პრემიერმა ხაზი გაუსვა იმასაც, რომ ნატო, სამხედროსთან ერთად, პოლიტიკური სტრუქტურაცაა და პირობა დადო, რომ ახალი მთავრობა ინსტიტუტების დემოკრატიულობის განმტკიცებისთვის ყველაფერს გააკეთებს. "ჩვენ ყველაფერს გავაკეთებთ იმისთვის, რომ ჭეშმარიტად განვავითაროთ დემოკრატიული ინსტიტუტები. ის პრობლემები, რაც რამდენიმე დღის წინ შეიქმნა, ჩემი აზრით, დაკავშირებული იყო ზუსტად იმასთან, რომ ყოფილი ხელისუფლება, ჭეშმარიტი დემოკარტიული ინსტიტუტების მშენებლობის ნაცვლად, ფასადური გამონათქვამებით კმაყოფილდებოდა და არ იყო საკმარისი გამჭვირვალობა საზოგადოებაში და მათ რიცხვში - ჯარის შენაერთებშიც. საქართველოს ახალი გუნდი ყველაფერს გავაკეთებთ, რომ ჩვენი ყველა ქმედება გასაგები იყოს საერთაშორისო თანამეგობრობისთვის და ნატო-სთვის. ყველაფერს გავაკეთებთ, რომ დასახულ მიზნების მივაღწიოთ, საქართველომ უახლოეს მომავალში მოახრეხოს და გახდეს ნატოს წევრი ქვეყანა", - აღნიშნა ივანიშვილმა და აქვე საქართველოსთვის გაწეული დახმარებისთვის პირადად ანდერს ფოგ რასმუსენსა და ნატო-ს სტრუქტურებს მადლობა გადაუხადა.
Tbilisi Time
ცინიზმით სავსე და უსინდისოდ მოლაპარაკე ვირთხა... 
