საქართველოს პრეზიდენტის მიხეილ სააკაშვილის განცხადებით, მთელი საქართველოს მასშტაბით პოლიციაში საგანგებო მდგომარეობა უნდა გამოცხადდეს, ვინაიდან ამნისტიის შედეგად ათასობით დამნაშავე გარეთ გამოდის და ეს ყველაფერი პოლიციამ უნდა გააკონტროლოს. ამის შესახებ პრეზიდენტმა გარდაბნის რაონში სოფელ ჯანდარაში მამედოვების ოჯახთან სტუმრობისას განაცხადა.

„ტელევიზორში კი არ უნდა ყელყელაობა პოლიციას, ყოველ კუთხეში პატრული უნდა იყოს, ყოველ ნაბიჯზე. საგანგებო მდგომარეობა უნდა იყოს მთელს საქართველოში",- ამბობს სააკაშვილი და აღნიშნავს, რომ ამნისტიის შედეგად გათავისუფლებული ხალხი „ჟიგულიანი საქართველოს" დროს შევიდა ციხეში, იქიდან გამოსვლის შემდეგ კი „მერსედესებიან საქართველოში" ხვდება. პრეზიდენტის განცხადებით, ეს ადამიანები ყველანაირად ცდილობენ წაგლიჯონ ხელიდან პატიოსან, მშრომელ ხალხს ამდენი წლის განმავლობაში ნაგროვები ქონება.

„მარტო კი არ ქურდობენ, მოდიან და ადამიანს თითს ჭრიან, აუთოებენ. თუმცა, მთავარია კლიმატის გავლენა - როცა მოგვიწოდებენ, გაგებით შევხვდეთ, საზოგადოება ვერ შეხვდება გაგებით იმას, რომ წლების ნაგროვებს ნაძირალა მუქთახორა ყაჩაღი წაართმევს და წაიღებს",- ამბობს სააკაშვილი.

პრეზიდენტთან ერთად მამედოვების ოჯახს ქვემო ქართლის გუბერნატორი დავით კირკიტაძეც ესტუმრა, რომელმაც განაცხადა, რომ ბოლო 2 თვის განმავლობაში მკვეთრად გაუარესდა კრიმინოგენული ვითარება და თუ ბოლო 9 წლის განმავლობაში ყაჩაღობის სულ 9 შემთხვევა იყო დაფიქსირებული, ბოლო 2 თვეში 13 ყაჩაღობა მოხდა.

მამედოვების ოჯახის წევრები კი ამბობენ, რომ 5-მა შეიარაღებულმა პირმა ისინი ჯერ აწამა, შემდეგ კი ფული 15 ათასი ლარის ოდენობით და ოქრო გაიტაცა.

ამ დროისთვის ხუთივე დამნაშავე დაკავებულია. შინაგან საქმეთა სამინისტრომ დანაშავეების დაკავების შესახებ ინფორმაცია გუშინ გაავრცელა.