მთავარი » 2012»ნოემბერი»29 » ირმა ჭკადუა - ირაკლი ოქრუაშვილი ზურაბ ჟვანიას გარდაცვალების საქმეზე მნიშვნელოვან დეტალს ამხელს
06:29
ირმა ჭკადუა - ირაკლი ოქრუაშვილი ზურაბ ჟვანიას გარდაცვალების საქმეზე მნიშვნელოვან დეტალს ამხელს
ადვოკატ ირმა ჭკადუას ინფორმაციით, თავდაცვის ყოფილი მინისტრი ირაკლი ოქრუაშვილი ზურაბ ჟვანიას გარდაცვალების საქმესთან დაკავშირებით მნიშვნელოვან დეტალს ამხელს. როგორც ჭკადუამ "ინტერპრესნიუსს" განუცხადა, ეპიზოდი, რომელიც შესაძლოა, საქმის გამოძიებისას მნიშვნელოვან ჩვენებად იქცეს, ოქრუაშვილმა მასთან შეხვედრის დროს გაიხსენა. "რამდენიმე დღის წინ მე და ლალი მაროშკინამ ციხეში ირაკლი ოქრუაშვილი მოვინახულეთ. მასთან ბევრ საკითხზე ვისაუბრე, მაგრამ განსაკუთრებით ჟვანიას გარდაცვალების საქმე მაინტერესებდა. ოქრუაშვილმა კონკრეტიზაციისგან თავი შეიკავა, მაგრამ ერთი ეპიზოდი გაიხსენა და მითხრა: "ჟვანიას გარდაცვალების ამბავი რომ გავიგე, მიხეილ სააკაშვილთან მივედი, თავი ხელებში ჰქონდა ჩარგული, მეგონა ნერვიულობდა და ხმა არ ამომიღია, მაგრამ უცებ თავი ასწია და მითხრა: ეს რა ჭირი მოვიშორეთო". ოქრუაშვილის თქმით, ეს მისთვის შოკი იყო", - აცხადებს ირმა ჭკადუა. ადვოკატის განმარტებით, ოქრუაშვილის განცხადება ძალიან მნიშვნელოვანია, რომლითაც ჟვანიას გარდაცვალების საქმეზე მომუშავე გამომძიებლები უნდა დაინტერესდნენ. "მე, როგორც ადვოკატი ვფიქრობ, რომ თუკი ოქრუაშვილი აღნიშნულს სამართალდამცველებთანაც დაადასტურებს, სერიოზული საფუძველი შეიქმნება იმისთვის, რომ პრეზიდენტი მიხეილ სააკაშვილი მინიმუმ დაკითხვაზე დაიბარონ და მოსთხოვონ ახსნა-განმარტება, თუ რას გულისხმობდა ჟვანიას მისამართით ნათქვამ სიტყვებში", - აღნიშნა ადვოკატმა. ამასთან, ირმა ჭკადუას თქმით, ირაკლი ოქრუაშვილი მზად არის, ამ საკითხთან დაკავშირებით გამოძიების კითხვებსაც უპასუხოს. ადვოკატი ირმა ჭკადუა საზოგადოებრივი მონიტორინგის ჯგუფის წევრია და ოქრუაშვილი სწორედ ჯგუფის ფარგლებში მოინახულა. მისი განცხადებით, ოქრუაშვილს აღნიშნული ეპიზოდის "საიდუმლოდ დატოვება" მისთვის არ უთხოვია.
რა საინტერესო იქნება ამ საქმის დეტალების გაცნობა საინტერესოა, ასეთი რა ჭირი იყო ყოფილი ხელისუფლებისათვის ზურაბ ჟვანია, რომ მისი მოშორება სააკაშვილისთვის პრინციპული საკითხი იყო, რაც საკმაოდ წარუმატებლად და დილეტანტურად შესრულებინა თავის ხელის ბიჭებს.
Tbilisi Time
