ცნობების თანახმად, ავღანეთში საბრძოლო მისიის შესრულებისას დაიღუპა
ქართველი სამხედრო მოსამსახურე, კაპრალი მინდია აბაშიძე. საქართველოს
თავდაცვის სამინისტრო ავრცელებს განცხადებას, რომელშიც ღრმა მწუხარებას
გამოთქვამს 1988 წლის 27 ოქტომბერს დაბადებულ კაპრალ მინდია აბაშიძის
გარდაცვალების გამო და სამძიმარს უცხადებს დაღუპულის ოჯახს. აბაშიძე იყო
სახმელეთო ჯარების მესამე ქვეითი ბრიგადის 32-ე მსუბუქი ქვეითი ბატალიონის
საცეცხლე ჯგუფის მეთაური. ის ავღანეთის სამშვიდობო მისიაში მონაწილეობდა
2010-2011 წლებშიც. მინდია აბაშიძე არის ავღანეთში სამშვიდობო მისიის
შესრულებისას დაღუპული 18-ე ქართველი სამხედრო მოსამსახურე.
თბილისის საკრებულოში „ქართულ ოცნებას“ სავარაუდოდ ფრაქცია ეყოლება თბილისის საკრებულოში უმრავლესობაში მყოფი ფრაქცია ”ნაციონალური მოძრაობა” ოთხმა დეპუტატმა დატოვა. როგორც ახალი ამბების სააგენტო ”ინტერპრესნიუსი“ იუწყება, ამჯერად ”ნაცმოძრაობის” რიგებიდან წავიდნენ გიორგი ნემსაძე და მერაბ რაფავა. 1-ელი ოქტომბრის საპარლამენტო არჩევნებამდე კი უმრავლესობას მიხეილ ქავთარაძე და ირაკლი შიხიაშვილი გაემიჯნენ. საკრებულოს ეს ოთხი წევრი ახლა ცალკე ფრაქციის ფორმირებისთვის ემზადება. ამასთან, სააგენტოს წყაროს ცნობით, საკრებულოს უმრავლესობიდან წამოსული დეპუტატები მხარდაჭერას ”ქართულ ოცნებას” უცხადებენ.
მერვე მოწვევის პარლამენტი შეკრებისთანავე ამნისტიის შესახებ კანონის მიღებას აპირებს. ამის შესახებ ღიად აცხადებენ არჩევნებში გამარჯვებული „ქართული ოცნების“ ლიდერები, რომელთა თქმითაც, კანონპროექტის ძირითადი ნაწილი უკვე შეთანხმებულია კოალიციაში შემავალ სუბიექტებთან. გარდა ამისა, ახალი ხელისუფლება ასევე აპირებს ეგრეთ წოდებული „პოლიტპატიმრების“ გათავისუფლებასაც.
საქართველოს სახელმწიფო ჰუმანიზმის პრინციპებიდან გამომდინარე, ერთჯერადი, დროებითი და განსაკუთრებული ღონისძიების სახით, საზოგადოებრივი საშიშროების გათვალისწინებით, ამ კანონის საფუძველზე სისხლისსამართლებრივი პასუხისმგებლობისა და სასჯელის მოხდისაგან ათავისუფლებს საქართველოს სისხლის სამართლის კოდექსით გათვალისწინებულ დანაშაულებში ეჭვმიტანილ, ბრალდებულ, განსასჯელ და მსჯავრდებულ პირებს - ასეთია ამნისტიის შესახებ საქართველოს კანონის სტანდარტული შესავალი, ორიგინალურია მხოლოდ მუხლების ჩამონათვალი. კოალიციის ერთ-ერთი ლიდერის, სოზარ სუბარის, თქმით, ამნისტია არ შეეხება ორგანიზებულ და სხვა მძიმე დანაშაულს.
„ამნისტია აუცილებელია, ამაზე ვიმსჯელეთ უკვე გუნდში. კანონპროექტი უკვე შემუშავებულია. შესაბამისად, როდესაც პარლამენტი შეიკრიბება, ამნისტიაც მალე გამოცხადდება. ზოგადად ეს შეეხება ეკონომიკური ტიპის დანაშაულს და ისეთ დამნაშავეებს, რომელთა გამოშვება საზოგადოებრივ წესრიგს არ შეუქმნის საფრთხეს“, - უთხრა სოზარ სუბარმა რადიო თავისუფლებას.
ამნისტიის შესახებ კანონზე იმუშავებს მერვე მოწვევის პარლამენტში ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე ეკა ბესელია, რომელიც პროცესში, კოლეგა-დეპუტატების გარდა, სამოქალაქო საზოგადოების ჩართვასაც აპირებს:
„ძალიან მოკლე დროში ვაპირებ უფლებადამცველებისა და სამოქალაქო საზოგადოების წარმომადგენლებთან ერთად ექსპერტთა საბჭო შევქმნა. მათთან ერთად ვაპირებ ამნისტიის შესახებ კანონპროექტის მომზადებას. მათთან ერთად ვაპირებ ისეთი მექანიზმების შექმნას, რომელიც შესაძლებელს გახდის პოლიტიკური ნიშნით დაპატიმრებული ადამიანების გათავისუფლებას.
პოლიტიკური ნიშნით დაპატიმრებული ადამიანების გათავისუფლების აუცილებლობაზე ლაპარაკობენ ადგილობრივი უფლებადამცავი ორგანიზაციებიც, მათ შორის, ადამიანის უფლებათა დაცვის ცენტრი, რომლის ხელმძღვანელის უჩა ნანუაშვილის თქმით, ევროსაბჭოს საპარლამენტო ასამბლეის მიერ მიღებული ზოგადი კრიტერიუმების მიხედვით, საქართველოში 150-ამდე პოლიტპატიმარია:
„საუბარია თუნდაც ახალგაზრდული ორგანიზაციების წარმომადგენლებზე, თუნდაც მელორ ვაჩნაძეზე, ლევან გოგიჩაიშვილზე, შოთა იამანიძეზე და ა.შ., ანუ იმ ახალგაზრდულ ლიდერებზე, რომლებიც სხვადასხვა აქციებზე ახალგაზრდობას უკეთებდნენ მობილიზებას და, ფაქტობრივად, ამის გამო იქნენ დასჯილები. არის ასევე გარკვეული ჯგუფი ე.წ. მძევლებისა, რომლებიც, ფაქტობრივად, დაკავებული არიან მათი ოჯახის წევრების აქტიური საზოგადოებრივ-პოლიტიკური საქმიანობის გამო. მაგალითად, ქალბატონი ნორა კვიციანი, რომელიც მისი ძმის ნაცვლად იქნა დაკავებული. აქვე შეიძლება აღვნიშნოთ თორნიკე მოლაშვილი, რომელიც რეალურად მისი ძმის, სულხან მოლაშვილის გამოა დაკავებული.“
საქართველოში პოლიტპატიმართა არსებობას უარყოფენ მოქმედი ხელისუფლების წარმომადგენლები. ამ აზრს გარკვეულწილად იზიარებს არასამთავრობო ორგანიზაცია „თავისუფლების ინსტიტუტის“ აღმასრულებელი დირექტორი გიორგი მელაძე, რომელსაც საქართველოში 150 პოლიტპატიმრის არსებობა წარმოუდგენლად მიაჩნია.
„ძალიან დიდი რიცხვია! როგორც წესი, პოლიტპატიმრებზე როცა ლაპარაკობენ, ყველაზე ცუდ დიქტატურაშიც კი გულისხმობენ 5-10 პოლიტპატიმარს. აქ 100-150 წარმოუდგენელი რიცხვია... ძალიან საინტერესოა. უნდა გამოქვეყნდეს ამ ადამიანების საქმეები. საზოგადოებას უფლება აქვს იცოდეს, რა დანაშაულებია, როგორი ბიოგრაფიები აქვთ... ძალიან ბევრზე ყოფილა განცხადება რომ პოლიტპატიმარია, მაგრამ მერე აღმოჩენილა, რომ ჩადენილი აქვს რაღაც კონკრეტული დანაშაული, ხულიგნობიდან დაწყებული, სხვისი ქონების ანდა ჯანმრთელობის დაზიანებით დამთავრებული“, - უთხრა გიორგი მელაძემ რადიო თავისუფლებას.
საქართველოსთან მიმართებით ტერმინ პოლიტპატიმარს არ იყენებს საერთაშორისო უფლებადამცავი ორგანიზაცია „ჰიუმენ რაიტს უოჩი“, რომლის მკვლევრის, გიორგი გოგიას თქმით, ორგანიზაცია განიხილავდა პოლიტიკური მოტივით დაპატიმრებული პირების არსებობის შესაძლებლობას, როცა საქართველოს ადმინისტრაციულ სამართალდარღვევათა კოდექსის ხარვეზებზე მსჯელობდა:
„მსჯელობისას ვხელმძღვანელობდით იმით, რომ ეს კანონი არღვევდა საერთაშორისო სტანდარტებს და ხშირად გამოიყენებოდა ხელისუფლების მიერ პოლიტიკური მოტივებით, ანუ ხდებოდა აქტივისტების თუ პროტესტის გამომხატველი პირების დაკავება, მაგრამ როგორც ასეთი, ტერმინი „პოლიტპატიმარი“ ჩვენ არ გამოგვიყენებია.“
თუმცა არჩევნებში გამარჯვებული პოლიტიკური ძალის წარმოამადგენლებს, მათ შორის, იუსტიციის მომავალ მინისტრს თეა წულუკიანს ეჭვი არ ეპარება, რომ ბევრი პატიმარი ახალი ხელისუფლებისგან სამართლიანობის აღდგენას ელოდება. ვინ არიან ისინი? თეა წულუკიანის პასუხი: „ზის, მაგრამ არ ჩაუდენია. ზის, მაგრამ ბრალი არ დაუმტკიცდა ან ზის, მაგრამ არაადეკვატურად მაღალი სასჯელი აქვს მისჯილი. ამ ადამიანებს, რა თქმა უნდა, ხვედრი უნდა შევუმსუბუქოთ, აღვადგინოთ მათი დარღვეული უფლებები. ვინც უკანონო პატიმარია, მათი საქმეები ძალიან მოკლე ვადაში უნდა გადაიხედოს, რათა მათ დატოვონ საპატიმროები.“
საპატიმროებს ასევე დატოვებენ ამნისტიით გათავისუფლებული პირებიც, თუმცა ჯერჯერობით უცნობია რომელ მუხლებს მოიცავს კანონი, არადა, „თავისუფლების ინსტიტუტის“ აღმასრულებელი დირექტორის, გიორგი მელაძის თქმით, სწორედ ეს არის მნიშვნელოვანი, რადგან ამნისტია, როგორც პოლიტიკურ-სამართლებრივი ინსტრუმენტი, დიდწილად განსაზღვრავს დანაშაულის წინააღმდეგ ბრძოლის პოლიტიკას.
„ანუ ამნისტია აჩვენებს, თუ როგორია სახელმწიფოს დამოკიდებულება საზოგადოების იმ ნაწილის მიმართ, რომელმაც კანონი დაარღვია, იწყნარებს მათ თუ არა. ანუ ეს არის პოლიტიკური თემა და, შესაბამისად, პოლიტიკური მიზანშენწონილობიდან გამომდინარე, უნდა იქნეს გადაწყვეტილება მიღებული. ამის გამო, ძალიან საინტერესო იქნება ამნისტიის მონიტორინგი, ანუ ის, თუ რას ჩათვლის სახელმწიფო შესაწყნარებელ დანაშაულად. შეიძლება ასეთად ჩათვალოს ფინანსური მაქინაციები, წვრილმანი ხულიგნობები, ქურდობები, ხულიგნობა, ძარცვა, ყაჩაღობა და ასე შემდეგ. ყოველივე ამას უნდა დავაკვირდეთ. ვნახოთ, რა მოხდება“, - უთხრა გიორგი მელაძემ რადიო თავისუფლებას.
კიდევ რამდენი სიცოცხლე უნდა შევწიროთ ქართველებმა ამ უაზრო ომს?
ეს მისია უაზროდ გაიწელა დროში, ისლამისტ ფუნდამენტალისტებთან ბრძოლა და მათი დამარცხება შეუძლებელია,მათთან სხვა მიდგომაა საჭირო, რამდენ თავსაც მოკვეთ ამ გველეშაპს, ორი იმდენი ამოუვა.
ამ ახალაზრდის მშობლებს ჰკითხოს ვინმემ, უღირდათ კი ამ სენთან ბრძოლა საკუთარი შვილის სიცოცხლედ?
რამდენი საკითხია სასწრაფოდ გადასაწყვეტი? სერიოზული და დაუღალავ მუშაობა მოუწევს ახალ პარლამენტს, საზოგადოებამ მათ დიდი ნდობა გამოუცხადა და შედეგსაც შესაბამისს ელის.
უნდა გამოცხადდეს საყოველთაო ამნისტია და ამაში უნდა ჩართონ ამ საქმეში გარკევულ ადამიანები, წვრილმანი დანაშაულისთვის გასამართლებული პირები, ვისაც ნახევარ მოხდილი აქვს, ყველა უნდა განთავისუფლდეს, მათ იმდენი უბედურება გადაიტანეს საკმარისია. იქნებ ნახევარი მაინც ამ კონტინგნტიდან სრულყოფილ ადამიანებად გამოვიდნენ იმ ჯოჯოხეთიდან.
ეს უგულავა რას მიედმოედება, სულელია ეს კაცი თუ სხვა გონია სულელი? ეხლა სასწრაფოს შპს-დ გადაკეთებაზე დაიწყო საუბარი, ანუ, ფასიანი გახდება, თუ ვინმემ შეისყიდა.
Tbilisi Time
