Tbilisi Time
ჩვენ ნაჩქარევად კი არა, ჩქარა ვაშენებთ, - ამის შესახებ საქართველოს პრეზიდენტმა მიხეილ სააკაშვილმა განაცხადა."ვინც რა უნდა ილაპარაკოს, გვლანძღონ, გვაკრიტიკონ, სხვადასხვა ბგერები გამოსცენ, ჩვენ მაინც ავაშენებთ. ჯობია გვაკრიტიკონ იმაზე, რასაც ვაკეთებთ. ვიღაცას შუშის სახლი არ მოსწონს, ვიღაც ამბობს, ცუდადაა გაკეთებული, წყალი ჩამოდის, ბათქაში ჩამოცვივდაო ან კიდევ არქიტექტურას იწუნებს. კი ბატონო, "ეს რას გავს", მაგრამ ის რამეს გავდა, არაფერი რომ არ კეთდებოდა და არ შენდებოდა? ამბობენ, ნაჩქარევად აკეთებენ ყველაფერსო – ნაჩქარევად კი არა, ჩქარა ვაკეთებთ, იმიტომ, რომ იმდენი დრო გვაქვს დაკარგული, რომ ყველა ცხვირაწეული ადამიანის გულს ვერ მოვიგებთ", - განაცხადა მიხეილ სააკაშვილმა გლდანში, სადაც მან პროფესიული გადამზადების ცენტრისა და სპორტული კომპლექსის მშენებლობას ჩაუყარა საფუძველი.
მისივე თქმით, საქართველოსთვის 2011 წელი აღმშენებლობის წელი იყო, რაც 2012 წელსაც გაგრძელდება.
"ნახეთ, როგორ გავაკეთეთ თბილისის ცენტრი. საქართველოს ისტორიის არც ერთ პერიოდში ერთად აღებულ 5 წელში იმდენი არ აშენებულა, რაც გასულ 5 წელიწადში. ამას ვერავინ დააყენებს ეჭვქვეშ. შემდეგ 2 წელიწადში კი უნდა აშენდეს იმაზე მეტი, ვიდრე გასულ 5 წელში. ესაა ჩვენი ვალდებულება, სხვა შანსი არ გვაქვს, სხვანაირად ვერ გამოვძვრებით მსოფლიო პროცესებიდან და იმ პრობლემებიდან, რომლებსაც საქართველოს უქმნიან. საქართველოსთვის წლევანდელი წელი აღმშენებლობის წელიწადია", - აღნიშნა სააკაშვილმა.
"ინტერპრესნიუსი"
ჭკვიანი
